Birna er auðveld og ljúf reiðhryssa sem allir geta riðið. Hún hefur gott tölt.

Rein er gullfalleg hryssa með frábært tölt og gott brokk. Hún er hágeng, þæg og skemmtileg hryssa sem bæði gæti hentað vel í keppni og sem frábært reiðhross. Hún er stór og myndarleg hryssa með gott geðslag.

Zeta er góð klárhryssa sem er með 8,05 fyrir byggingu og 7,84 fyrir hæfileika. Hún er með 8,5 fyrir tölt, brokk, vilja og fegurð í reið. Zeta er hryssa sem á inni og gæti klárlega hækkað í dóm. Hún er hágeng, viljug og þæg.

Klerkur er stóðhestur á 4.vetur undan hinum frábæra Álf frá Selfossi og Röst frá Glóru sem var klárhryssa. Klerkur er u.þ.b 3 mánaða taminn og lítur út fyrir að hann verði klárhestur. Hann er rétt farinn að stíga í tölt og er með flottar hreyfingar og fótaburð. Hann er þægur og mjög meðfærilegur í allri umgengni og með gott geðslag. Efni í keppnishest.

Einurð er falleg alhliðahryssa með mjög gott tölt (fylfull). Hún er þæg og meðfærileg með gott geðslag. Móðir Einurðar, Erpa er Geysisdóttir frá Gerðum og er hún sýnd í kynbótadóm með 7,93 í ae. Erpa hefur gefið eina 1.verðlauna hryssu, Eflingu frá Vestri Leirárgörðum.

Flottur klárhestur (ógeltur) með mjög góðar gangtegundir. Gæti hentað mjög vel í fjórgang og tölt. Þægur, meðfærilegur og auðveldur hestur.

Ugla er góð alhliða hryssa sem er með frábærar ættir. Hún er undan 1.verðlaunahryssunni Jódísi frá Reykjavík og Aroni frá Strandarhöfði. Ugla er hágeng, þæg og meðfærileg hryssa sem gæti hentað bæði í keppni sem og ræktun.

Mjög góður reiðhestur með góðan vilja, gott tölt og brokk og rými. Kvistur er spakur og meðfærilegur í umgengni.

Fjalar er stór og fallegur 100% traustur hestur sem allir geta riðið. Hann er með ágætt tölt og brokk. Ágætlega rúmur og viljinn eins og hver og einn vill hafa í það skiptið.

Fluga er myndarleg, alþæg, og töltgeng hryssa sem allir geta riðið. Tilvalin fyrir lítið vanan reiðmann en hún er alltaf hreingeng á tölti.

Pæja er efnileg 5gangs hryssa með mjög góðar gangtegundir. Hún er þæg en viljug og getur hentað jafnt sem gott reiðhross eða sem keppnishross í 5gang.

Gjörð er mjög efnileg hryssa í 5gang. Hún er viljug en þæg og geta flestir riðið henni. Tölt er frábært og rúmt með góðum fótburði, brokk einnig mjög gott, lítið hefur verið átt við skeið en hún er flugvökur og auðveld. Gjörð hentar einnig mjög vel sem reiðhross fyrir þann sem vill hreingenga og þægilega hryssu. Spöng móðir hennar er 1.verðlauna Gáskadóttir og því eftirsóknarvert blóð í þessari hryssu.

Bláskeggur er stóðhestur með alveg gullfallegan lit, móvindóttur. Hann var dæmdur í vor og hlaut þá 8,20 fyrir byggingu og 7,59 fyrir hæfileika. Þetta er mjög mikið efni í flottan 5gangara sem og töltara. Hann er mjög rúmur, hágengur, með frábært geðslag og gangtegundir. Viljinn er frábær og segja má að nánast allir geti riðið honum og haft mjög gaman af enda glæsilegur hestur. Liturinn erfist vel frá honum og er hann mjög prúður og skemmtilegur í allri umgengni.