Hafðu samband
Sími/phone 664-8000/ Haukur,
664-8001/ Ragga.
Email; austuras@austuras.is

Aría frá Austurási sigrar folaldasýningu.

Akkur frá Austurási

 

Hrossaræktarfélag Villingaholtshrepps hélt árlega folaldasýningu sína að þessu sinni hjá okkur í Austurási í gær, 16.febrúar.  Þátttaka var frábær eða 35 folöld sem mættu til leiks.  Margir fallegir og vel gengir gripir sáust þarna og þeim fylgdi góður hópur af fólki, þannig að það var ansi margt um manninn í Austurási í gær og mikil fjölgun á hausafjölda hrossa í húsinu þann daginn.  Dómarar voru Ársæll Jónsson og Albert Jónsson og gengu dómstörf vel fyrir sig hjá þeim heiðursmönnum.  Við ákváðum að fara með Aríu frá Austurási sem er undan Spólu frá Syðri Gegnishólum(8.20) Sjóladóttir frá Dalbæ og Hákoni frá Ragnheiðarstöðum.  Aría er óvenjuglæsilegt folald, allavega að okkar mati(; lofthá, geysilega þroskuð og með fljúgandi fallegar hreyfingar með miklum fótaburði, svifi og rými.  Aría hlaut 1.sæti í hryssuflokk og var valin glæsilegasta folald sýningar.  Við fórum einnig með Akk frá Austurási sem er jarpur foli undan Yrpu frá Kílhauni(8.15) Illingsdóttir og Mætti frá Leirubakka.  Akkur er flugrúmur , skrefmikill foli sem fer mikið um á tölti. 

Við fórum svo með folöldin á Hrafnkelsstaði í dag þar sem tekið var höfðinlega á móti mönnum og hrossum af vinum okkar þeim Jóhönnu og Haraldi og voru folöldin sennilega fegin að koma í öryggið hjá þeim frábæru hjónum þar sem dekrað er við þau.  Kindaáhugamaðurinn Loftur Breki kom að sjálfsögðu með og hafði með nesti handa Dóru og  Doppu(kindur(;) og naut sín í botn.

Aría frá Austurási

 

Aría

Góðir gestir og ræktendur mættir í Austurás.